Hver eru á bak við KakóGull?
Hæ!
Við erum Tinna og Jakob, hjón sem reka litla kakóvefverslun hér á Íslandi, KakóGull.
Við erum algjörlega heilluð af hreinu kakói, hvað það hefur gert fyrir okkur og hvað það hefur gert fyrir ótal aðra. Við trúum einlæglega að þessi dásamlega planta hafi djúpa, jákvæða krafta sem geta umbreytt lífum á ótrúlegustu vegu.
Allt byrjaði þetta þegar við fórum í okkar fyrstu kakóathöfn. Það var ýmislegt sem hefði getað komið í veg fyrir að við færum í þessa athöfn, bíllinn okkar var í ólagi, það var kalt og dimmt íslenskt vetrarkvöld, og við vorum bæði á frekar þungum stað. Það var ýmislegt krefjandi í gangi í lífum okkar, orkan var lág, og allt virtist einvhernvegin vera erfiðara en það þurfti að vera. En einhvern veginn fór það svo að við mættum í þessa kakóathöfn. Athöfnin sjálf var ekki alveg eins og við höfðum búist við—hún var ekki lífsbreytandi í sjálfri sér—en eitthvað breyttist innra með okkur eftir á. Við fundum fyrir meiri léttleika, bjartsýni, opnun og lífið virtist allt í einu ekki vera eins þungt og krefjandi og áður.
Þetta vakti hjá okkur forvitni og við ákváðum að kafa dýpra. Við fórum að prófa mismunandi tegundir af kakó frá mismunandi stöðum úr heiminum, drukkum það reglulega, og fljótlega varð þessi magnaði og dásamlegi drykkur hluti af lífi okkar.
Eftir því sem við lærðum meira um hreina kakóið uppgötvuðum við að kostir þessarar ofurfæðu virðast óendanlegir. Hvort sem það er að auka orku, bæta skap, auka sköpunarkraft, dýpka sambönd eða styðja næringarþarfir, þá hefur kakó einstakan hæfileika til að koma fólki í jafnvægi og tengja það við sjálft sig og aðra á dýpri hátt.
Þannig fæddist KakóGull. Okkur fannst við vera kölluð til að deila þessari einstöku gjöf og gera hana aðgengilega fyrir fleiri. Markmið okkar er skýrt: að deila umbreytandi krafti fyrsta flokks hátíðar-kakós með Íslendingum og víðar, svo sem flestir geti upplifað gleðina og heilunina sem það færir.
Með kakó-kærleikskveðjum
Tinna & Jacob
